Маш их ирээдүйтэй, ашигтай бизнест ОРГАНИК ХҮНСНИЙ БИЗНЕС
5 сар, 1 долоо хоног өмнө


“Соёолж” зохимжит хоолны газрынхаа ажиллагааг энэ оны нэгдүгээр сарын арван наймнаас түр зогсоох гэж байна.

Бид үүсэл хөгжлийн эхний үе шатыг дуусгав. Зүйрлүүлж хэлвэл, эрүүл зөв бойжуулсан сайн үрслэгээ нас гүйцэж, түүнийг талбайд гаргах цаг нь ирсэн. Маш сайн ургац өгөх цэцэрлэгийн үрслэгээг минь аваад, цаашид хамтран тариалж, их ургац хураах хүнийг хайж байна.


СОЁОЛЖ ЗОХИМЖИТ ХҮНСНИЙ СУДАЛГАА, СУРГАЛТ, ХООЛНЫ ГАЗАР

2006 оны 2 сарын 22-нд “Соёолж”-ийг нээснээс хойш 10 жил өнгөрчээ. Түвэггүй шингэж, хэрэгтэй бүхнээр хангаж, эрүүл, гоо сайхан байлгах эрдэм, чадалтай идээ, ундааг цаг улирал, биеийн төлөв байдалд тохируулан хэрэглэх мэдлэг, хүсэлтэй хүмүүст зориулсан хоолны газар юм. Үйлчлүүлэгчид таашаал эдлүүлэхийн тулд хүнсний чанарыг алдагдуулах амтлагаа, технологи хэрэглэдэггүй. Биологийн идэвхт эрдэст амьд ус, органик мах, дайвар бүтээгдэхүүн, сүү, цагаан идээ, аму будаа, бүдүүн ширхэгтэй төрөл бүрийн гурил, органик ногоо, амтлагчаар бэлтгэсэн улаан, цагаан, ногоо хоол, ундаар үйлчилдэг. Эрүүл мэндээ дэмжих, архаг өвчнөө эдгээх, хэвийн жинтэй болох зорилготой олон хүмүүс үйлчлүүлж, хүссэн үр дүндээ хүрч, сэтгэл ханамжтай байсан газар. Салбаруудаа нээхийг тэд байнга санал болгосоор ирсэн.

Үүсгэн байгуулагч бидэнд энэ бизнесийг өргөжүүлэн дэлгэрүүлэх хөрөнгө мөнгө дутагдаж байна. Мөнгөнөөс бусад зүйл бидэнд бий.

Хүмүүст идэхийн таашаал эдлүүлдэг янз бүрийн зэрэглэлийн хоолны газрууд Монголд аль ч цагт ажилласаар байх болно. Тэдний дунд элдэв урсгал, загварт автагдахгүй, эрүүл байх жам ёсонд нийцсэн зохимжит хоолны газар байх хэрэгтэй. Энэ бол монголын нийгмийн энэ цаг үеийн эрэлт, захиалга, нийтийн эрх ашиг.

Үндсэн хоёр эрэлт байгаагийн эхнийх нь - биедээ зохимжтой хооллодог болсон болон ингэж хооллохыг хүсэж байгаа олон хүний эрэлт хэрэгцээ, дараагийнх нь - тэдний бодит үр дүн, үлгэр жишээг эрүүл мэндийн боловсролд ашиглах эрэлт юм. Ийм дадлагын газар заавал байх шаардлагатай. Хүмүүсийн зан үйлийг өөрчилж чаддаггүй сургалт, төслөөс илүү үр нөлөөтэй ийм хоолны газар бол зүгээр нэг бизнес биш бөгөөд монголчууд бид өөрсдөө л бие биедээ туслахаас өөр арга одоохондоо алга.

Идэхийн тулд амьдарч байгаа мэтээр мэдрэхүйн таван таашаалд умбаж, хүслээ хангангаа эрүүл мэндээ хорлож, сэрээ, халбагаараа булшныхаа нүхийг өөрөө ухан хиарсаар байвал ямар ч дайн, гамшиггүйгээр сүйрэх аюул монголчуудад бодитой нүүрлээд байгааг өвчлөлт, нас баралтын сүүлийн жилүүдийн үзүүлэлт харуулж байна.

Бараг бүх хүн сургаар биш өөрийн бие дээр буруу хооллолтын үр дагаврыг амсаж мэдэрсэн, олон хүн ойлгож мэдсэн цаг тул тэдний сонирхлыг овсгоотойгоор ашиглаж, эрүүл хооллолт нэрийг ашиглан, хүмүүсийг төөрөгдүүлсэн бизнес цэцэглэх энэ үед жинхэнэ зохимжит хоолны газар ажиллаж байх нь тун чухал байна. Эс гэвэл эрүүл хооллохыг хүссэн хүмүүсийн оролдлого, зүтгэл талаар болж, цаг алдахын хор хөнөөл их юм.

Цаг алдана гэдэг нь үр удам маань эрүүл биш төрөх нь ихсэж, өвчин зовлон улам хүндрэх бодит аюулыг хэлж байна.

Одоо цагийн бизнесийг маш амжилттай эрхэлж яваа боловч бүтээгдэхүүн, үйлчилгээ нь хүнд тус хүргэдэггүйг ойлгодог учир үе үе сэтгэл нь эмзэглэдэг тухай ярих бизнесмен бас байдаг л юм билээ. Байгалд хөнөөлгүй, эрүүл мэндэд хэрэгтэй гэх мэтээр эцсийн үр дүнгээр нь үргэлж бахархах бизнес эрхлэх хүсэл тийм хүнд байдаг гэсэн. Бүх зүйл мөнгөөр хэмжигддэггүйг их мөнгөтэй болсон хүн зөвшөөрөхөд дөхөм бизээ.

Хамтрах хүн заавал бизнесмен байх албагүй бөгөөд хөрөнгө босгох чадвартай бизнес биш хүн байж болох юм. /бизнесийн байгууллагыг хамтрагчаар авч үзэхгүй байгаа нь тодорхой шалтгаантай/.

Эрхэмлэх суртахуунтай, маш их ирээдүйтэй, ашигтай энэ бизнесийг хэн нэгэн чадварлаг бизнесмен өндөр түвшинд авч явах ёстой.

Дээр бичсэн зүйл ямар хүний зүрх сэтгэлд хүрч, бидэнтэй уулзах вэ?

Нэгдүгээрт, нийгэмд тустай үйл бүтээх чин хүсэлтэй. Энэ бизнесийг зөвхөн өөрөө ашиг олох зорилгоор биш, бусдад туслахын тулд эрхлэх чадвартай байх нь чухал.

Хоёрдугаарт, бүх хүнд таалагдах бизнес биш бөгөөд үйлчлүүлэгч сэтгэлээ боловсруулахад нь тусалдаг ажил гэдгийг хүлээн зөвшөөрөх. Зохимжит хоолны газрын бизнесийг үнэхээр органик хүнсээр, зөв технологиор, жинхэнэ утгаар нь хийж, үйлчлүүлэгчийн үзсэн үр дүнгээр энэ бизнес хүлээн зөвшөөрөгдөж, тууштай хөгжинө. Өнгөрсөн найман жилд бид энэ шугамаас өчүүхэн ч хазайгаагүй тул сайн нэр хүндийг олсон. Тогтвортой үйлчлүүлэгчтэй байж, хүрээг нь тууштай тэлэх үр дүнтэй аргыг бид сурсан.

Гуравдугаарт, өндөр ашигтай бизнес гэдгийг харж чадах. Биедээ зохимжтой хооллохын чухлыг хүлээн зөвшөөрсөн хүмүүсийн тоо өдрөөс өдөрт тасралтгүй өсөн нэмэгдэх нь гарцаагүй нөхцөл болоод байна. Эмчилгээнд биш урьдчилан сэргийлэлт, амьдралын зөв дадал, түүний дотор зохимжтой хооллолтод мөнгөө зарцуулах нь ашигтай гэдэг нь олон хүнд тодорхой болж байгаа цаг. Эмчилгээний зардлын өсөлт, эрүүл болох зорилгын биелэлт хоёрын хамаарлыг одоо хэн хүнгүй дэргэдээсээ харж болж байна.

Зохимжит хоолны “Соёолж” брэнд одоогоор өрсөлдөгчгүй. Бидний 10 жилийн туршлагыг судлахад яагаад ингэж хэлж байгааг ойлгож болно.

Түүнчлэн “Соёолж” зохимжит хоолны газар /өндөр зэрэглэлийн ресторан, кафе, түргэн болон сувиллын хоолны газар,органик бейкери/, түүнчлэн монгол органик хүнсний худалдааны сүлжээг орон нутаг болон гадаадад дэлгэрүүлэх боломж маш өндөр.

Дөрөвдүгээрт, өөрөө зохимжтой хооллогч, эсвэл зохимжтой хооллолтыг бүрэн дэмжигч байх. Өвдөж, үр дүн муутай эмчлүүлж байсан, эцэст нь эмгүйгээр эдгэсэн туршлагатай бол сайн. Хүн гэдэг нь өөрөө өөрийгөө цэвэрлэж, сэргээн засварлаж, байнга өөрчлөгдөн шинэчлэгдэж, тохируулдаг систем учраас наанадаж буруу хооллож өөрийгөө хорлохгүй бол эдгэхгүй өвчин байхгүй гэдэг үнэнийг бие, сэтгэлээрээ үзэж мэдэрсэн хүн зохимжтой хооллолтыг дэлгэрүүлэхэд хувь нэмэр оруулахыг хичээнэ.

Хүмүүс хүнс, хоолны рекламд бүрэн автахаа больж, зөв сонголт хийж чадах туршлагатай болж байгаа энэ цагт сонголтын бүх хувилбарууд, жишээ нь “Соёолж” зохимжит хоолны газар зах зээлд байх хэрэгтэй гэж боддог.

“Үрслэгээ”-ний эзэн бидэнд дараах зүйл байна. Үүнд:

1. Энэ салбарт анхдагч

2. Найман жилийн туршлага, нэр хүнд

3. Бизнесийг хөгжүүлэх өвөрмөц арга зүйг олсон. Сурталчилгаа ба сургалтын хөтөлбөр туршигдаж, цэгцэрсэн.

4. Тууштай үйлчлүүлэгч, дэмжигчидтэй.

5. Үр дүн нь нотлогдсон технологтой

6. Цусны бүлэг, улирал цаг, биеийн төлөв хослуулсан ердийн болон сувиллын хоолны цэстэй

7. Сэтгэлээрээ ажилладаг чадварлаг баг, хүний нөөцтэй.

https://www.facebook.com/SoyoljFood/